ಪೆರ್ನಾಲ್ ಸಂಭ್ರಮ ಧಾರ್ಮಿಕ ಚೌಕಟ್ಟು ಮೀರಿ ಆಚರಿಸುವುದು ಮುಸ್ಲಿಮರಿಗೆ ಭೂಷಣವಲ್

ಪೆರ್ನಾಲ್ ಸಂಭ್ರಮ ಧಾರ್ಮಿಕ ಚೌಕಟ್ಟು ಮೀರಿ ಆಚರಿಸುವುದು ಮುಸ್ಲಿಮರಿಗೆ ಭೂಷಣವಲ್ಲ

*ಪವಿತ್ರ ರಂಝಾನ್ ತಿಂಗಳು ವಿಶ್ವಾಸಿ ವೃಂದದೊಂದಿಗೆ ವಿದಾಯ ಹೇಳಿದಾಗ ಜಾಗತಿಕ ಮುಸ್ಲಿಂ ಸಮುದಾಯದ ಬಳಿಗೆ ಸಾಂತ್ವನ ಸ್ಪರ್ಶ ನೀಡುತ್ತಾ ಆಗಮಿಸುವ ಶವ್ವಾಲ್ ತಿಂಗಳು ರಂಝಾನ್ ವ್ರತಾಚರಣೆಯ ಸಮಾರೋಪವಾಗಿದೆ.*

*ಒಂದು ತಿಂಗಳುಗಳ ಕಾಲ ಪ್ರಭಾತದಿಂದ ಪ್ರದೋಷದ ತನಕ ಅಖಿಲ ಬ್ರಹ್ಮಾಂಡ ಸೃಷ್ಟಿ-ಸಂಹಾರ ಕರ್ತ ಅಲ್ಲಾಹುವಿನ ತೃಪ್ತಿಗಾಗಿ ಅನ್ನ ಪಾನೀಯಗಳನ್ನು ತ್ಯಜಿಸಿ ಕಡ್ಡಾಯ ವ್ರತಾನುಷ್ಠಾನ ಕೈಗೊಂಡು ಶುದ್ಧ ಹೃದಯವಂತರಾಗಿ ಧಾರ್ಮಿಕ ನವಚೈತನ್ಯ ದೊಂದಿಗೆ ಈದುಲ್ ಫಿತ್ರ್ ಎಂಬ ಮಹತ್ವಪೂರ್ಣ ಹಬ್ಬಾಚರಣೆ ಮಾಡುವಾಗ ರಂಝಾನ್ ತಿಂಗಳ ತಾಜಾ ಪವಿತ್ರತೆ ಮೇಳೈಸಿರಬೇಕಾದದ್ದು ಅನಿವಾರ್ಯವಾಗಿದೆ.*

*ಮಾನವರ ಸಂತೋಷ-ಸಂಭ್ರಮಗಳೆಲ್ಲವೂ ಇಸ್ಲಾಂ ಧರ್ಮದ ಚೌಕಟ್ಟನ್ನು ಮೀರಬಾರದೆಂಬ ಮಹೋನ್ನತ ಸಂದೇಶವನ್ನು ಈದುಲ್ ಫಿತ್ರ್ ಅಥವಾ ಪೆರ್ನಾಳ್ ಹಬ್ಬ ಜಗತ್ತಿಗೆ ಸಾರುತ್ತಿದೆ.*

*ರಂಝಾನ್ ತಿಂಗಳ ಕೊನೆಯ ದಿನದ  ಪ್ರಜ್ವಲ ಸೂರ್ಯ, ಪಶ್ಚಿಮ ಬಾಂದಳದಿಂದ ಮರೆಯಾದಾಗ ಶವ್ವಾಲ್ ತಿಂಗಳ ಬಾಲಚಂದಿರ ಪಶ್ಚಿಮ ಬಾನಂಗಳದಲ್ಲಿ ಬೆಳ್ಳಿ ಕಿರಣಗಳನ್ನು ಮೂಡಿಸುತ್ತಾ ಪ್ರತ್ಯಕ್ಷವಾಗುವಾಗ ಜಾಗತಿಕ ಮುಸ್ಲಿಂ ಸಮುದಾಯದ ಮೈಮನಗಳಲ್ಲಿ ಸಂಭ್ರಮ,ಸಡಗರದ ಅಲೆಗಳೇಳ ತೊಡಗುತ್ತದೆ.*
*ಸತ್ಯವಿಶ್ವಾಸಿಗಳ ತುಟಿಗಳಿಂದ ಹೊರಡುವ ಅಲ್ಲಾಹು ಅಕ್ಬರ್ ( ಅಲ್ಲಾಹು ಮಹೋನ್ನತನು ) ಎಂಬ ಮಧುರ ಧ್ವನಿಗಳು ದಿಗಂತ ಬೇಧಿಸುತ್ತಾ  ಸಾಗತೊಡಗುತ್ತವೆ.*

*ಶವ್ವಾಲ್ ಒಂದರ ಸೂರ್ಯನು ಪೂರ್ವದಿಕ್ಕಿನಲ್ಲಿ ವರ್ಣಚಿತ್ತಾರ ಬಿಡಿಸಿ ಪ್ರಪಂಚಕ್ಕೆ ಹೊಂಬೆಳಕು ಚೆಲ್ಲುತ್ತಾ ಧಾವಿಸಿ ಬರುವಾಗ ಮಕ್ಕಳು, ಪುರುಷರು, ಮಹಿಳೆಯರೆಲ್ಲ ಮಿಂದು, ಶುಭ್ರ ವಸ್ತ್ರಧಾರಿಗಳಾಗಿ ಈದುಲ್ ಫಿತ್ರ್ ಸಂಭ್ರಮವನ್ನು ಕೊಂಡಾಡಲು ಹಾತೊರೆಯುತ್ತಾರೆ.*

*ತಕ್ಬೀರ್ ಧ್ವನಿಗಳನ್ನು ಉಚ್ಚರಿಸುತ್ತಾ ಪುರುಷರು, ಬಾಲಕರು ಮಸೀದಿ ಅಥವಾ ಈದ್ಗಾದ ಕಡೆಗೆ ಆತ್ಮಾನುಭೂತಿಯ ಹೆಜ್ಜೆಗಳನ್ನು ಹಾಕುವಾಗ,ಮಹಿಳೆಯರು,ಯುವತಿಯರು,ಬಾಲಕಿಯರು ಮನೆಯಲ್ಲೇ ಈದುಲ್ ಫಿತ್ರ್ ನಮಾಝ್ ನ ಅನರ್ಘ್ಯ ನಿಮಿಷಗಳನ್ನು ಅನುಭವಿಸಿ ಆತ್ಮ ಸಂತೃಪ್ತಿ ಪಡೆಯುತ್ತಾರೆ.*

*ಮದರಂಗಿಯ ವರ್ಣಚಿತ್ತಾರಗಳನ್ನು ಕೈಗಳಿಗೆ ಲೇಪಿಸುತ್ತಾ ಆನಂದಾತಿರೇಕದ ಸಾಗರದಲ್ಲಿ ತೇಲಾಡುವ ಯುವತಿಯರು, ಈದುಲ್ ಫಿತ್ರ್ ಹಬ್ಬವನ್ನು ಮನದಣಿಯೇ ಆಚರಿಸಿ ಸಂಭ್ರಮ ಪಡುತ್ತಾರೆ.*

*ಈದುಲ್ ಫಿತ್ರ್ ಅಂಗವಾಗಿ ಅರ್ಹರು ಅರ್ಹರನ್ನು ಹುಡುಕಿ ಕಡ್ಡಾಯ ದಾನವಾದ ಫಿತ್ರ್ ಝಕಾತ್,ಪ್ರತಿಯೊಬ್ಬರ ಪರವಾಗಿ 2 ಕಿಲೋ 600 ಗ್ರಾಂ ಆಯಾ ಪ್ರದೇಶದ ಆಹಾರ  ಧಾನ್ಯಗಳನ್ನು ನೀಡುವ ಮೂಲಕ ವ್ರತಾಚರಣೆಯ ಸಂಪೂರ್ಣ ಪ್ರತಿಫಲ ಪಡೆದು ಆತ್ಮಸಂತೃಪ್ತಿ ಅನುಭವಿಸುವ ನಿಮಿಷಗಳನ್ನು ವರ್ಣಿಸಲಸಾಧ್ಯ.*

*ಸೂರ್ಯೋದಯದ ಬಳಿಕ ಅಲ್ಪ ಸಮಯ ಕಳೆದು ಆರಂಭವಾಗುವ ಈದುಲ್ ಫಿತ್ರ್ ನಮಾಝ್ ನಿರ್ವಹಿಸಿದ ಬಳಿಕ ಮಸೀದಿ, ಈದ್ಗಾಗಳಿಗೆ ತೆರಳಿದವರು ಪರಸ್ಪರ ಈದುಲ್ ಫಿತ್ರ್ ಶುಭಾಶಯಗಳನ್ನು ವಿನಿಮಯ ಮಾಡುತ್ತಾ ಹಬ್ಬದ ಆನಂದವನ್ನು ಅನುಭವಿಸುವ ನೋಟ ನಿಜಕ್ಕೂ ಕಣ್ಣಿಗೊಂದು ಹಬ್ಬ!*

*ಈದುಲ್ ಫಿತ್ರ್ ನಮಾಝ್ ಬಳಿಕ ಪ್ರತಿಯೊಬ್ಬರೂ ಮನೆಮನೆಗಳಿಗೆ ತೆರಳಿ ಹಬ್ಬದ ತಿಂಡಿ ತಿನಿಸುಗಳು, ಭೂರಿ ಭೋಜನವನ್ನು ಸವಿದು  ಹಬ್ಬವನ್ನು ವಿಶಿಷ್ಟ ರೀತಿಯಲ್ಲಿ ಆಚರಿಸುವುದು ಎಲ್ಲೆಡೆ ನಡೆದು ಬರುತ್ತಿರುವ ಒಂದು ಉತ್ತಮ ಸಂಪ್ರದಾಯವಾಗಿದೆ.*

*ಯಾವುದಾದರೂ ಕಾರಣ ಗಳಿಂದಾಗಿ ಪರಸ್ಪರ ಕೋಪಿಸಿಕೊಂಡವರು ಕೂಡ ಈದುಲ್ ಫಿತ್ರ್ ಹಬ್ಬದಂದು ಎಲ್ಲವನ್ನೂ ಮರೆತು ಸಹೋದರತೆ ಮೆರೆಯುತ್ತಾರೆ.*
*ಆದರೆ ಈ ಬಗ್ಗೆ ಅಸಡ್ಡೆ ತೋರಿಸಿ ಹಿಂದಿನ ಅದೇ ವೈರತ್ವದಲ್ಲಿ ಮುಂದುವರಿಯುವ ಭಾಗ್ಯಹೀನರು ಕೂಡ ನಮ್ಮ ನಡುವೆಯಿದ್ದಾರೆನ್ನಲು ದುಃಖ ವಾಗುತ್ತಿದೆ.*

*ಇತರ ಸಮುದಾಯ ಬಾಂಧವರನ್ನು ಕೂಡ ಹಬ್ಬದ ಸಂದರ್ಭದಲ್ಲಿ ಮನೆಗೆ ಕರೆದು ಸತ್ಕರಿಸುವುದು ನಮ್ಮ ನಡುವೆ ಕಾಣುವ ಉತ್ತಮ ಸಂಪ್ರದಾಯವಾಗಿದೆ.*
*ಇತರ ಜನಸಮುದಾಯದವರು ಅನ್ಯರಲ್ಲ,ಮಾನವರು ಸಹೋದರರು ಎಂಬ ವಿಶ್ವ ಭ್ರಾತೃತ್ವ ಭಾವನೆಗಳನ್ನು ತೋರ್ಪಡಿಸುವ ಮೂಲಕ ಮುಸ್ಲಿಂ ಸಮುದಾಯ ಮಾನವ ಸೌಹಾರ್ದತೆಯ ಮಹೋನ್ನತ ಸಂದೇಶವನ್ನು ಸಾರಿ ,ಇಸ್ಲಾಂ ಧರ್ಮದ ಶಾಂತಿ, ಸೌಹಾರ್ದತೆಯ ಬೋಧನೆಗಳನ್ನು ಈ ವೇಳೆ ಮನುಕುಲಕ್ಕೆ ನೆನಪಿಸಲಾಗುತ್ತಿದೆ.*

*ಹಬ್ಬದ ಸಂಭ್ರಮದ ನಡುವೆ ವಿವಿಧ ಕಡೆಗೆ ಅನಗತ್ಯ ಸುತ್ತಾಟ ಇಂದಿನ ಒಂದು ಸರ್ವೇಸಾಮಾನ್ಯ ದೃಶ್ಯ.*
*ಯುವಕರು,ಬಾಲಕರು ಹೀಗೆ ಎಲ್ಲರೂ ಧಾರ್ಮಿಕ ಚೌಕಟ್ಟು ಮೀರಿ ಸುತ್ತಾಟ ನಡೆಸುವ ಮೂಲಕ ಹಬ್ಬದ ಪಾವಿತ್ರ್ಯತೆಗೆ ಧಕ್ಕೆ ತರಲೆತ್ನಿಸುವುದು ದೊಡ್ಡ ದುರಂತವೆನ್ನದೆ ವಿಧಿಯಿಲ್ಲ.*

*ಈದುಲ್ ಫಿತ್ರ್ ಆಗಲಿ ಇನ್ನಿತರ ಯಾವುದೇ ಹಬ್ಬಗಳಾದರೂ ಇಸ್ಲಾಂ ಧರ್ಮದ ಚೌಕಟ್ಟು ಮೀರಿ ಸಂಭ್ರಮ ಪಡೆಯುವಾಗ ಅದಕ್ಕೆ ಯಾವುದೇ ಪ್ರತಿಫಲ ವಿರುವುದಿಲ್ಲ.ಅದು ಅಲ್ಲಾಹುವಿನ ಕೋಪಕ್ಕೆ ಕಾರಣವಾಗುತ್ತದೆ.*
*ಅಲ್ಲಾಹು ಇಷ್ಟಪಡುವ ರೀತಿಯಲ್ಲಿ ದರ್ಗಾ ಝಿಯಾರತ್,ಕುಟುಂಬಿಕರ ಖಬ್ರ್ ಸಂದರ್ಶನ ಮೂಲಕ ಉತ್ತಮ ಕಾರ್ಯಗಳನ್ನು ಮಾಡುವ ಬದಲು, ತಲೆಗೆ ಹಸಿರು ರುಮಾಲುಗಳನ್ನು ಸುತ್ತಿ ಬೈಕ್,ಕಾರುಗಳಲ್ಲಿ ವಿಕೃತವಾಗಿ ವರ್ತಿಸುತ್ತಾ ಸಾಗುವ ಕೆಲವು ದಾರಿತಪ್ಪಿದ ಯುವಕರ ಗುಂಪುಗಳನ್ನು ಎಲ್ಲೆಡೆಗಳಲ್ಲೂ ಕಾಣಬಹುದು.*
*ನಿಜವಾಗಿ ಇದು ಇಸ್ಲಾಂ ಧರ್ಮದೊಂದಿಗೆ ತೋರುವ ಧಿಕ್ಕಾರವಾಗಿದೆ.*
*ಈ ಕೆಟ್ಟ ಸಂಪ್ರದಾಯಕ್ಕೆ ಇನ್ನಾದರೂ ಕಡಿವಾಣ ಹಾಕಿ,ಇಸ್ಲಾಮೀ ಹಬ್ಬಗಳ ಮಹತ್ವವನ್ನು ಎತ್ತಿ ತೋರಿಸಲು ಪ್ರತಿಯೊಬ್ಬರೂ ಮುಂದಾಗಬೇಕು.*

*ಸತ್ಯವಿಶ್ವಾಸಿಗಳು ನನಗಾಗಿ ಸಂತೋಷ ಪ್ರಕಟಮಾಡಿ ನನ್ನ  ವಿನೀತ ದಾಸರಾಗಿ ಪರಲೋಕ ಯಶಸ್ಸು ಪಡೆಯಬೇಕೆಂದು, ಅಲ್ಲಾಹು ನಮಗೆ ಕೊಡುಗೆಯಾಗಿ ನೀಡಿದ ಸಂಭ್ರಮವನ್ನು ,ಅನಿಸ್ಲಾಮಿಕ ಮಾಪಿಳೆಪಾಟ್, ಗಾನ ಮೇಳ ಮೊದಲಾದ ಮ್ಯೂಸಿಕ್ ಸಹಿತವಿರುವ ಅನಿಷ್ಟ ಸಂಪ್ರದಾಯಗಳ ಮೂಲಕ ಅಂದಗೆಡಿಸುವುದು ನೈಜ ಮುಸ್ಲಿಮರಿಗೆ ಭೂಷಣವಲ್ಲ.*
*ಅಲ್ಲಾಹು ಹಾಗೂ ಅಲ್ಲಾಹುವಿನ ಅಂತಿಮ ಪ್ರವಾದಿ ಲೋಕಾನುಗ್ರಹಿ ಮುಹಮ್ಮದ್ ಮುಸ್ತಫಾ ಸ್ವಲ್ಲಾಹು ಅಲೈಹಿವ ಸಲ್ಲಂ ತಂಙಳ್ ಇಷ್ಪಡುವ ರೀತಿಯಲ್ಲಿ ಇಸ್ಲಾಂ ಧರ್ಮದ ಚೌಕಟ್ಟನ್ನು ಮೀರದೆ ಹಬ್ಬಾಚರಣೆ ಮಾಡುವ ಮೂಲಕ ನಾವೆಲ್ಲರೂ ಈದುಲ್ ಫಿತ್ರ್ ಹಬ್ಬದ ಪಾವಿತ್ರ್ಯತೆಯನ್ನು ಕಾಪಾಡೋಣ.*

✍🏻 *ಕೆ.ಎ.ಅಬ್ದುಲ್ ಅಝೀಝ್ ಝುಹ್ ರಿ ಪುಣಚ*

🌍🌍🌍🌍🌍🌍🌍🌍🌍🌍🌍