ಆತ್ಮ ಸಂಶುದ್ಧಗೊಳಿಸುವ ವಸಂತ ಕಾಲ ಪವಿತ್ರ ರಂಝಾನ್.. ಭಾಗ 03

ಸಕಲ ಸುಖಾಡಂಭರಗಳಿಂದ ತುಂಬಿಸಲ್ಪಟ್ಟ ಸ್ವರ್ಗೋದ್ಯಾನವನ್ನು ಜಗತ್ತಿನ ಸರ್ವ ಸತ್ಯ ವಿಶ್ವಾಸಿಗಳು ಆಶಿಸುತ್ತಾರೆ. ಇಹಲೋಕದಲ್ಲಿ ಮನುಷ್ಯನ ಕಣ್ಣು ಕಂಡಿರದ, ಮನುಷ್ಯನ ಮನದಲ್ಲಿ ಊಹಿಸಲಾಗದ ವಸ್ತುಗಳು ಸ್ವರ್ಗದಲ್ಲಿದೆ. ಸ್ವರ್ಗವನ್ನು ಆಶಿಸದವರು ಯಾರೂ ಇರಲಿಕ್ಕಿಲ್ಲ. ಅದೇ ಸ್ವರ್ಗವು ತನ್ನ ಒಡಲು ಸೇರಿಸಲು ನಾಲ್ಕು ವಿಭಾಗ ಜನರನ್ನು ಕಾತರದಿಂದ ಕಾಯುತ್ತಿದೆ. ಆ ನಾಲ್ಕು ವಿಭಾಗಗಳಲ್ಲಿ ಒಂದು ವಿಭಾಗವಾಗಿದೆ ರಮಳಾನ್ ತಿಂಗಳಲ್ಲಿ ಉಪವಾಸ ಆಚರಿಸುವವರು.
ಹೀಗೆ ರಮಳಾನ್ ತಿಂಗಳ ಮಹತ್ವ ಅಪಾರವಾದುದು. ನೆಬಿ ಸ.ಅ ಹೇಳಿದರು : "" ಯಾರಾದರೂ ಒಬ್ಬ ಮನುಷ್ಯನು ರಮಳಾನ್ ತಿಂಗಳಲ್ಲಿ ದ್ರಢ ವಿಶ್ವಾಸ ಹಾಗು ಪ್ರತಿಫಲಾಪೇಕ್ಷೆಯಿಂದ ಉಪವಾಸ ಆಚರಿಸಿದರೆ ಅವನ ಗತ ಕಾಲದ ಪಾಪಗಳನ್ನು ಮನ್ನಿಸಲಾಗುತ್ತದೆ.
ರಮಳಾನ್ ರಹ್ಮತಿನ ತಿಂಗಳು, ಮಗ್ಫಿರತಿನ ತಿಂಗಳು,ನರಕದಿಂದ ವಿಮೋಚನೆ ಲಭಿಸುವ ತಿಂಗಳು. ಸ್ವರ್ಗ ಪ್ರಾಪ್ತಿಯ ತಿಂಗಳು. ಆದುದರಿಂದ ರಮಳಾನ್ ತಿಂಗಳಿನಲ್ಲಿ ಕೆಲವೊಂದು ವಿಶೇಷ ಪ್ರಾರ್ಥನೆಗಳಿವೆ. ರಮಳಾನಿನಲ್ಲಿ ನಿರಂತರ ಹೇಳಬೇಕಾದ ಪ್ರಾರ್ಥನೆ :

أشهد أن لاإله إلاالله أستغفرالله أللهم إني أسألك الجنة وأعوذ بك من النار

' ಅಶ್ಹದು ಅಲ್ಲಾ ಇಲಾಹ ಇಲ್ಲಲ್ಲಾಹ್ ಅಸ್ತಗ್ಫಿರುಲ್ಲಾಹ್ ಅಲ್ಲಾಹುಮ್ಮ ಇನ್ನೀ ಅಸ್ ಅಲುಕಲ್ ಜನ್ನತ ವಅಊದ್ಸು ಬಿಕ ಮಿನ ನ್ನಾರ್ '

ಅರ್ಥ : ಅಲ್ಲಾಹನಲ್ಲದೆ ಬೇರೆ ಯಾರೂ ಆರಾಧ್ಯನಿಲ್ಲ ಎಂದು ನಾನು ಸಾಕ್ಷ್ಯ ವಹಿಸುತ್ತೇನೆ. ನಾನು ಅಲ್ಲಾಹನೊಂದಿಗೆ ಪಾಪ ವಿಮೋಚನೆ ಬೇಡುತ್ತೇನೆ. ಅಲ್ಲಾಹನೇ, ನಾನು ನಿನ್ನಲ್ಲಿ ಸ್ವರ್ಗವನ್ನು ಬೇಡುವೆನು. ನಾನು ನಿನ್ನೊಂದಿಗೆ ನರಕದಿಂದ ರಕ್ಷೆ ಯಾಚಿಸುವೆನು.

ರಮಳಾನಿನ ಪ್ರಥಮ ಹತ್ತು ದಿನಗಳು ರಹ್ಮತಿನ ಹತ್ತು ಆಗಿದೆ. ಅಲ್ಲಾಹನ ಅಪಾರ ಅನುಗ್ರಹಗಳು ವರ್ಷಿಸುವ ಹತ್ತು ಆಗಿದೆ. ಈ ಹತ್ತರಲ್ಲಿ ಅಲ್ಲಾಹನೊಂದಿಗೆ ರಹ್ಮತ್ ಬೇಡುವ ಈ ಪ್ರಾರ್ಥನೆ ನಡೆಸುತ್ತಿರಬೇಕು.

أللهم ارحمني يا أرحم الراحمين

ಅಲ್ಲಾಹುಮ್ಮ ರ್ಹಮ್ ನೀ ಯಾ ಅರ್ಹಮರ್ರಾಹಿಮೀನ್.

ಅರ್ಥ : ಪರಮ ದಯಾಳು ಆದ ಅಲ್ಲಾಹನೇ ನನಗೆ ನೀನು ಕರುಣೆ ತೋರು.

ರಮಳಾನಿನ ದ್ವಿತೀಯ ಹತ್ತು ಮಗ್ಫಿರತಿನ ಹತ್ತು ಆಗಿದೆ. ಪಾಪಗಳನ್ನು ಮನ್ನಿಸಲ್ಪಡುವ ಹತ್ತು. ಈ ಹತ್ತರಲ್ಲಿ ಈ ಕೆಳಗಿನ ದುವಾ ನಡೆಸುತ್ತಿರಬೇಕು.

أللهم اغفر لي ذنوبي يا رب العالمين

ಅಲ್ಲಾಹುಮ್ಮ ಗ್ಫಿರ್ ಲೀ ದ್ಸುನೂಬೀ ಯಾ ರಬ್ಬಲ್ ಆಲಮೀನ್

ಲೋಕ ಪರಿಪಾಲಕನಾದ ಅಲ್ಲಾಹನೇ ನನ್ನ ಪಾಪಗಳನ್ನು ಕ್ಷಮಿಸು.

ರಮಳಾನ್ ತಿಂಗಳ ಕೊನೆಯ ಹತ್ತು ದಿನಗಳು ನರಕದಿಂದ ವಿಮೋಚಿಸಲ್ಪಡುವ ಮತ್ತು ಸ್ವರ್ಗ ಪ್ರವೇಶ ನೀಡಲ್ಪಡುವ ದಿನಗಳಾಗಿವೆ. ಈ ಹತ್ತರಲ್ಲಿ ಅಲ್ಲಾಹನು ತನ್ನ ಪಾಪಿಗಳಾದ ದಾಸರನ್ನು ನರಕದಿಂದ ವಿಮೋಚಿಸಿ ಸ್ವರ್ಗ ನೀಡುತ್ತಾನೆ. ಅದೇ ರೀತಿ ಅಪಾರ ಪ್ರಮಾಣದಲ್ಲಿ ಸತ್ಯ ವಿಶ್ವಾಸಿಗಳು ಸ್ವರ್ಗ ಪ್ರಾಪ್ತರಾಗುವ ಹತ್ತು ಆಗಿದೆ. ಆದುದರಿಂದ ಕೊನೆಯ ಹತ್ತರಲ್ಲಿ ಈ ಕೆಳಗಿನ ಪ್ರಾರ್ಥನೆ ನಡೆಸುತ್ತಿಬೇಕು.

أللهم أعتقني من النار وأدخلني الجنة يا رب العالمين

ಅಲ್ಲಾಹುಮ್ಮ ಅ ಅ್ ತಿಖ್ ನೀ ಮಿನ ನ್ನಾರ್ ವಅದ್ ಖಿಲ್ ನಿಲ್ ಜನ್ನತ ಯಾ ರಬ್ಬಲ್ ಆಲಮೀನ್.

ಅರ್ಥ : ಅಲ್ಲಾಹನೇ ನನ್ನನ್ನು ನರಕದಿಂದ ವಿಮೋಚಿಸು. ನನಗೆ ಸ್ವರ್ಗವನ್ನು ನೀಡು.

ಈ ಕೆಳಗಿನ ಪ್ರಾರ್ಥನೆಯನ್ನೂ ಕೊನೆಯ ಹತ್ತರಲ್ಲಿ ನಡೆಸುತ್ತಿರಬೇಕು.

أللهم إنك عفو تحب العفو فاعف عنى

ಅಲ್ಲಾಹುಮ್ಮ ಇನ್ನಕ ಅಫುವ್ವುನ್ ತುಹಿಬ್ಬುಲ್ ಅಫ್ವ ಫಹ್ಫು ಅನ್ನೀ

ಅರ್ಥ : ಅಲ್ಲಾಹನೇ ನಿಶ್ಚಯವಾಗಿಯೂ ನೀನು ಕ್ಷಮಾಶೀಲನಾಗಿರುವಿ. ಕ್ಷಮಾಶೀಲತೆಯನ್ನು ನೀನು ಇಷ್ಟ ಪಡುವೆ. ಆದುದರಿಂದ ನನಗೆ ನೀನು ಕ್ಷಮೆ ನೀಡು.