ಪ್ರೀತಿಸಿದವರನ್ನು ಪ್ರೀತಿಸಿ

ಮಹಾತ್ಮರಾದ ಫಾರಿಸುನ್ನಜ್ಜಾರ್(ರ) ರವರು ಹೇಳುತ್ತಾರೆ; "ಒಮ್ಮೆ ಮಹಾನುಭಾವರಾದ ಇಬ್ರಾಹೀಮು ಬಿನು ಅದ್ ಹಂ(ರ) ರವರು ಜಿಬ್ರೀಲ್(ಅ) ರವರನ್ನು ಭೂಮಿಗೆ ಇಳಿದು ಬಂದಂತೆ ಕನಸು ಕಂಡರು. ಆಗ ಮಹಾತ್ಮರ ಪ್ರಶ್ನೆ, "ಓ ಜಿಬ್ರೀಲ್, ಯಾಕೆ ಇಲ್ಲಿ ಬಂದಿದ್ದೀರಾ?". "ನಾನು ಮುಹಿಬ್ಬೀನ್(ಪ್ರೇಮಿ)ಗಳ ಹೆಸರನ್ನು ನೋಂದಾಯಿಸಲು ಬಂದಿದ್ದೇನೆ" ಅವರು ಉತ್ತರಿಸಿದರು. ಮಹಾತ್ಮರಿಗೆ ಕುತೂಹಲ!. "ಯಾರು ಆ ಪ್ರೇಮಿಗಳೆಂದು ಹೇಳಬಹುದೇ?". "ಮಾಲಿಕ್ ಬಿನು ದೀನಾರ್, ಸಾಬಿತುಲ್ ಬುನಾನೀ, ಅಯ್ಯೂಬು ಸ್ಸಿಜಸ್ತಾನೀ ಮುಂತಾದವರು ಎಂದಾಗಿತ್ತು ಜಿಬ್ರೀಲರ ಮರುತ್ತರ. "ನನ್ನ ಹೆಸರು ಆ ಪಟ್ಟಿಯಲ್ಲಿಲ್ಲವೇ?" ಇಬ್ರಾಹೀಮ(ರ) ರ ಪ್ರಶ್ನೆ. "ಇಲ್ಲ" ಜಿಬ್ರೀಲರು ಪ್ರತಿಕ್ರಿಯಿಸಿದರು. "ಹಾಗಾದರೆ ಆ ಪ್ರೇಮಿಗಳನ್ನು ಪ್ರೇಮಿಸುವವರ ಲಿಸ್ಟಲ್ಲಾದರೂ ನನ್ನನ್ನು ಸೇರಿಸಿ ಬಿಡಿ" ಎಂದರು ಇಬ್ರಾಹಿಂ ಬಿನು ಅದ್ ಹಂ(ರ). ತಕ್ಷಣ ಜಿಬ್ರೀಲರಿಗೆ ಇಲಾಹೀ ಸಂದೇಶ ಬಂತು. "ಇಬ್ರಾಹೀಮರ ಹೆಸರನ್ನು ಮೊದಲ ಪ್ರೇಮಿಗಳ ಲಿಸ್ಟ್ ನಲ್ಲಿ ಒಂದನೇಯದ್ದಾಗಿ ಬರೆಯಿರಿ!".(ಅಅ್ಲಾಮುಸ್ಸೂಫಿಯ್ಯ)
ಇಲ್ಲಿ ಮುಹಿಬ್ಬ್ ಎಂಬುದು ಅಲ್ಲಾಹನನ್ನೂ, ರಸೂಲರನ್ನೂ ಪ್ರೀತಿಸಿದವರು ಎಂಬರ್ಥಕ್ಕೆ. ನಿಜವಾದ ಪ್ರೀತಿ ಅದು ತಾನೇ?!. ಅದಲ್ಲದ್ದೆಲ್ಲವೂ ವ್ಯರ್ಥ. ಆ ದೈವಿಕ ಪ್ರೀತಿಯಿಟ್ಟ ಔಲಿಯಾಗಳನ್ನು ಪ್ರೀತಿಸಿದರೂ  ಉನ್ನತ ಸ್ಥಾನಕ್ಕೇರಬಹುದು. ಸದಾ ಆ ನೈಜ ಪ್ರೀತಿಯನ್ನು ಚಿಮ್ಮಿಸುವಂತದ್ದಾಗಲಿ.