ಎಂಟಾಣೆಯ ಕಾರುಬಾರು

ಎಂಟಾಣೆಯ ಕಾರುಬಾರು

*✍🏻ಯೂಸುಫ್ ನಬ್‌ಹಾನಿ ಕುಕ್ಕಾಜೆ*
📞00971553499119

   ▪ *ಒಮ್ಮೆ ಪ್ರವಾದಿ* ಮುಹಮ್ಮದ್ ಸ್ವಲ್ಲಲ್ಲಾಹು ಅಲೈಹಿ ವಸಲ್ಲಮರು ಒಂದು ಕಂದೂರ (ಖಮೀಸ್) ಖರೀದಿಸಲು ಬಜಾರಿಗೆ ಹೋದರು. ಹೋಗುವಾಗ ಪ್ರವಾದಿಯವರ ಜೇಬಿನಲ್ಲಿ ಎಂಟು *ದಿರ್‌ಹಮ್* ಇತ್ತು.
   ▪ *ದಾರಿಮಧ್ಯೆ* ಯಾವುದೋ ಒಂದು ಮನೆಯ ದಾಸಿ ಹುಡುಗಿ (ಕೆಲಸದಾಳು) ಬಹಳ ಬೇಸರದಿಂದ ಅಳುತ್ತಿದ್ದಳು. ಪ್ರವಾದಿಯವರು ಅವಳಲ್ಲಿ ಕೇಳಿದರು. *"ನೀನು ಯಾಕೆ ಅಳುತ್ತಿರುವಿ..? ಏನು ಕಾರಣ..? ಏನಾಗಿದೆ ನಿನಗೆ ಹೇಳು..?"* ಆಗ ಅವಳು ಹೇಳಿದಳು. *"ನಾನು ಒಂದು ಮನೆಯಲ್ಲಿ ಕೆಲಸಕ್ಕಿದ್ದೇನೆ. ಇವತ್ತು ಮನೆಯವರು ಸಾಮಾನು ಖರೀದಿಸಲು ಎರಡು ದಿರ್‌ಹಮ್ ಕೊಟ್ಟು ನನ್ನನ್ನು ಬಜಾರಿಗೆ ಕಳುಹಿಸಿದ್ದರು. ಆದರೆ ದಾರಿಮಧ್ಯೆ ಆ ಹಣ ನನ್ನಿಂದ ಎಲ್ಲೋ ಬಿದ್ದು ಹೋಗಿದೆ. ಎಲ್ಲಿ ಎಂದು ಗೊತ್ತಿಲ್ಲ. ಈಗ ಖಾಲಿ ಕೈಯಲ್ಲಿ ಮನೆಗೆ ಹೋದರೆ ನನ್ನನ್ನು ಹೊಡೆಯುತ್ತಾರೆ."*
   ▪ *ಇದನ್ನು* ಕೇಳಿದಾಕ್ಷಣ ತನ್ನ ಕೈಯಲ್ಲಿದ್ದ ಎಂಟು ದಿರ್‌ಹಮಿನಿಂದ ಎರಡು ದಿರ್‌ಹಮನ್ನು ಅವಳಿಗೆ ಕೊಟ್ಟು ನೇರವಾಗಿ ಬಜಾರಿಗೆ ಹೋಗಿ ಅಲ್ಲಿ ಒಂದು ಅಂಗಡಿಯಿಂದ ನಾಲ್ಕು ದಿರ್‌ಹಮ್ ಕೊಟ್ಟು ಒಂದು ಒಳ್ಳೆಯ ದರ್ಜೆಯ ಕಂದೂರ ಖರೀದಿಸಿದರು.
   ▪ *ಹೊಸ* ಕಂದೂರ ಖರೀದಿಸಿ ಮನೆಗೆ ಮರಳಿ ಬರುವಾಗ ಒಬ್ಬ ಬಡಪಾಯಿಯು ದಾರಿಯಲ್ಲಿ *"ನನಗೆ ಧರಿಸಲು ವಸ್ತ್ರ ಇಲ್ಲ. ಯಾರಾದರು ನನಗೆ ಒಂದು ವಸ್ತ ಕೊಟ್ಟರೆ ನಾಳೆ ಅವನಿಗೆ ಪರಲೋಕದಲ್ಲಿ ಅಲ್ಲಾಹನು ಸ್ವರ್ಗದ ವಸ್ತ್ರ ಉಡಿಸುವನು"* ಎಂದು ಬಹಳ ದನಿಯಲ್ಲಿ ಹೇಳುತ್ತಿದ್ದನು. ಇದನ್ನು ಕೇಳಿದಾಕ್ಷಣ ಪ್ರವಾದಿಯವರಿಗೆ ಕಣ್ಣೀರು ಹರಿದು ಬಂತು. ಆಚೀಚೆ ನೋಡದೆ ಆ ಹೊಸ ಕಂದೂರವನ್ನು ಅವನಿಗೆ ಕೊಟ್ಟು ಪುನಃ ಬಜಾರಿಗೆ ಹೋದರು. ಅಲ್ಲಿ ಎಂಟರಲ್ಲಿ ಬಾಕಿಯಾಗಿದ್ದ ಎರಡು ದಿರ್‌ಹಮ್ ಕೊಟ್ಟು ಒಂದು ಸಾಮಾನ್ಯ ದರ್ಜೆಯ ಕಂದೂರ ಖರೀದಿಸಿ ಮನೆಗೆ ಬಂದರು.
   ▪ *ಮನೆಗೆ* ಬರುವ ದಾರಿಮಧ್ಯೆ ಮೊದಲು ಎರಡು ದಿರ್‌ಹಮ್ ಕೊಟ್ಟ ಆ ಬಾಲಕಿ ಅಲ್ಲೇ ಮೊದಲಿನಂತೆಯೇ ಅಳುತ್ತಿದ್ದಳು. ಪ್ರವಾದಿಯವರು ಅವಳಲ್ಲಿ ಕೇಳಿದರು. *"ನೀನು ಇಲ್ಲೇ ಇದ್ದಿಯಾ..? ಇನ್ನೇನು ಸಮಸ್ಯೆ..? ಯಾಕೆ ಮನೆಗೆ ಹೋಗಲಿಲ್ಲ..? "* ಆಗ ಅವಳು ಹೇಳಿದಳು. *"ನಾನು ಎರಡು ದಿರ್‌ಹಮ್ ಕಳೆದು ಹೋದಾಗ ಅದನ್ನು ಹುಡುಕಾಡಲು ತುಂಬಾ ಸಮಯ ಇಲ್ಲಿ ವ್ಯಯಿಸಿದೆ. ಈಗ ನೀವು ಕೊಟ್ಟ ಎರಡು ದಿರ್‌‌ಹಮಿನಲ್ಲಿ ಸಾಮಾನು ಖರೀದಿಸಿದರೂ ತಡವಾದ ಕಾರಣ ಮನೆಗೆ ಹೋಗುವಂತಿಲ್ಲ. ಹೋದರೆ ನನ್ನ ಚರ್ಮ  ಸುಲಿಯುವರು"*
   ▪ *ಪ್ರವಾದಿಯವರು* ಅವಳಲ್ಲಿ ಹೇಳಿದರು. *"ಗಾಬರಿಪಡಬೇಡ. ನಾನು ನಿನ್ನೊಂದಿಗೆ ನಿಮ್ಮ ಮನೆಗೆ ಬರುತ್ತೇನೆ. ನೀನು ಹೆದರಬೇಡ ನಾನು ಸರಿ ಮಾಡುತ್ತೇನೆ."* ನಂತರ ಪ್ರವಾದಿ ಮುಹಮ್ಮದ್ ಸ್ವಲ್ಲಲ್ಲಾಹು ಅಲೈಹಿ ವಸಲ್ಲಮರು ಅವಳೊಂದಿಗೆ ಅವಳಿಗೆ ಶಿಫಾರಸು ಮಾಡಲು ಅವಳ ಮನೆಗೆ ಹೋದರು. ಮನೆ ತಲುಪಿದ ಅವರು ಮನೆ ಬಾಗಿಲಿನ ಹೊರಗೆ ನಿಂತು ಸಲಾಮ್ ಹೇಳಿದರು. ಆದರೆ ಮನೆಯೊಳಗೆ ಜನರಿದ್ದರೂ ಯಾವುದೇ ಉತ್ತರ ಬರಲಿಲ್ಲ. ಮತ್ತೊಮ್ಮೆ ಬಹಳ ದನಿಯೆತ್ತಿ ಹೇಳಿದರು. ಆಗಲೂ ಉತ್ತರವಿಲ್ಲ. ಕೊನೆಗೆ ಮೂರನೇ ಬಾರಿ ಸಲಾಮ್ ಹೇಳಿದಾಗ " ವ ಅಲೈಕುಮುಸ್ಸಲಾಮ್ ಯಾ ರಸೂಲಲ್ಲಾಹ್.." ಎಂಬ ಉತ್ತರ ಬಂತು. ಪ್ರವಾದಿಯವರು ಮನೆಯವರಲ್ಲಿ ಕೇಳಿದರು. *"ನಿವ್ಯಾಕೆ ನಾನು ಮೊದಲು ಎರಡು ಬಾರಿ ಸಲಾಮ್ ಹೇಳಿದಾಗ ಜವಾಬ್ ಕೊಡಲಿಲ್ಲ.?"* ಅದಕ್ಕೆ ಅವರು ಹೇಳಿದರು. *"ಯಾ ರಸೂಲಲ್ಲಾಹ್.., ನೀವು ಹೇಳಿದ ಸಲಾಮ್ ನಮಗೆ ಸರಿಯಾಗಿ ಕೇಳಿರುತ್ತದೆ. ಆದರೆ ನಿಮ್ಮ ಆ ಶಬ್ದ ಕೇಳುವುದು ನಮಗೆ ಬಹಳ ಇಷ್ಟ. ಅಲ್ಲದೆ ಮೂರು ಸಲ ಹೇಳಿದಾಗ ಅದರ ಬರಕತ್ ನಮಗೆ ಮತ್ತೂ ಮತ್ತೂ ದೊರಕಲಿ ಎಂಬ ಉದ್ದೇಶದಿಂದ ಮೌನವಾದೆವು."*
   ▪ *ನಂತರ* ಪ್ರವಾದಿಯವರು ಮನೆಗೆ ಬಂದ ವಿಷಯ ಹೇಳಿದಾಗ ಮನೆ ಮಾಲಿಕ ಹೇಳಿದರು. *"ಅವಳಿಗೆ ಮಾಫು ಮಾತ್ರವಲ್ಲ. ನೀವು ಈ ಕಡೆ ನಮ್ಮ ಮನೆಗೆ ಬಂದ ಕಾರಣ ನಾನು ಅವಳನ್ನು ದಾಸಿತನದಿಂದ ಮುಕ್ತಗೊಳಿಸಿ ಸ್ವತಂತ್ರಗೊಳಿಸಿದ್ದೇನೆ."*
   ▪ *ಈ* ಘಟನೆಯಿಂದ ಬಹಳ‌ ಸಂತೊಷಗೊಂಡ ಪ್ರವಾದಿ ಮುಹಮ್ಮದ್ ಸ್ವಲ್ಲಲ್ಲಾಹು ಅಲೈಹಿ ವಸಲ್ಲಮರು ತನ್ನ ಅನುಯಾಯಿಗಳಾಗ ಸ್ವಹಾಬಿಗಳಲ್ಲಿ‌ ಹೇಳಿದರು. *"ನನ್ನ ಇವತ್ತಿನ ಎಂಟು ದಿರ್‌ಹಮ್ ಬಹಳ ಬರಕತಿನದ್ದಾಗಿತ್ತು. ಅದರಲ್ಲಿ ಎರಡು ಕಂದೂರ ಖರೀದಿಯಾಯಿತು. ಮಾತ್ರವಲ್ಲ ಖರೀದಿಸಿದ ಕಂದೂರದಲ್ಲಿ ಒಂದನ್ನು ಒಬ್ಬ ಬಡವನಿಗೆ ಉಡಿಸಲು ಸಾಧ್ಯವಾಯಿತು. ಅಲ್ಲದೆ ಅದರಿಂದ ಸಾಧು ಹುಡುಗಿಯೊಬ್ಬಳನ್ನು ಸಂಕಷ್ಟದಿಂದ ಪಾರುಮಾಡಲು ಅವಕಾಶ ದೊರಕಿತು. ಸಾಲದ್ದಕ್ಕೆ ಅವಳ ದಾಸಿತನದಿಂದ ಮುಕ್ತಳಾಗಿ ಸ್ವತಂತ್ರಳಾಗುವುದಕ್ಕೂ ಕಾರಣವಾಯಿತು. ಒಟ್ಟಿನಲ್ಲಿ ಇಷ್ಟೆಲ್ಲಾ ಕಾರುಬಾರು ನಡೆದದ್ದು ಬರೇ ಎಂಟು ದಿರ್‌ಹಮಿನಿಂದ ಮಾತ್ರ. ಇಷ್ಟೊಂದು ಬರಕತಿನ ದಿರ್‌ಹಮನ್ನು ನಾನು ಎಂದೂ ಕಾಣಲಿಲ್ಲ."*

ಸಂಗ್ರಹ; ಇಮಾಮ್ ಸ್ವಫೂರಿಯ *ನುಝ್‌ಹತುಲ್ ಮಜಾಲಿಸ್* ಎಂಬ ಗ್ರಂಥ.